TVM.GE ახალი ამბების ვებ პორტალი
სკანდალი საქართველოს რკინიგზაში!
„ღამის მატარებელში თეთრეულიც კი არ არსებობს, არადა, ამაში 7 მილიონამდეა გადახდილი! სად გაქრა ეს ფული?“
ოლიგარქ ბიძინა ივანიშვილის გასაოცარი დემოკრატიის „ეპოქაში“ სხვადასხვა თანამდებობებზე დანიშნეს ისეთებიც, წინა რეჟიმის დროს „ნაციონალების“ ჩანაცვლებისთვის რომ ყელყელაობდნენ. ფინანსურ ოლიგარქიას, როდესაც ხელისუფლებისკენ მოიწევდა, ჰყავდა ისეთ ფასიანი პოლიტიკური აქტივისტები, რომლებმაც იცოდნენ წინასწარ, რომ თანამდებობებს დაიკავებდნენ როგორც საჯარო სამსახურებში, ასევე კაპიტალისტურ სახელმწიფოს კუთვნილ საწარმოებში. დემოკრატიის სახელით მოსული პოლიტიკური აფერისტები შემდეგ დემოკრატიის ნასახს არ ტოვებდნენ არსად და ეს ლოგიკურია, რადგან ისინი არა ხალხს, არამედ ფინანსურ ოლიგარქიას ემსახურებიან ემოკრატიისთვის „თავგამოდებულ“ კოკა გუნცაძეს, ლევან ჩიკვაიძეს, დაჩი ცაგურიას, ლევან გოგიჩაიშვილს, ჯაბა ჯიშკარიანს და კიდევ სხვებს (ლეგიონია მათი სახელი), პოლიტიკური დავალდებების შესრულებისთვის წინ ჯილდოები ელოდათ, ზოგს დეპუტატის მანდატი, ზოგს – ან სამეურვეო საბჭოს თავმჯდომარეობა, ან დირექტორის სავარძელი. ეს ადამიანები არასოდეს ყოფილან `უანგარო რევოლუციონერები~, ისინი რეაქციონერები იყვნენ მაშინაც კი, როცა „ნაციონალებს“ ლანძღავდნენ. ისინი ხალხის ინტერესებს არ ემსახურებოდნენ, არამედ სახელმწიფოს ხელში ჩასაგდებად იბრძოდნენ. ყველა, ვინც მათ რევოლუციონერებს უწოდებს, დიდ პოლიტიკურ შეცდომას უშვებს, რადგან თითეულ მათგანში მყარად ზის ექსპლუატატორის იდეოლოგია და ფსიქოლოგია. ესენი პირწავარდნილი კონტრრევოლუციონერები არიან. „საქართველოს ფოსტის“ დირექტორი ლევან ჩიკვაიძე, რომელმაც ეს თანამდებობა დემოკრატიის სახელით დაიკავა და ის ამ თანამდებობაზე მოსვლამდე იყო „საზოგადოება არჩევანის“ მოთავე. არანაირი არჩევანი არ დაუტოვა „საქართველოს ფოსტაში“ დასაქმებულებს, მილიონობით ლარი ხომ მიითვისა და მერე საქართველოს ფოსტაში მოინდომა პროფკავშირული კომიტეტის განადგურება, პროფკავშირს კარები ამოუქოლა და კედელი აუშენა. კოკა გუნცაძე, რომელიც დამოკრატიის სახელით მოითხოვდა თავისუფალი პროფკავშირების განვითარებას, როგორც კი საქართველოს რკინიგზის სამეთვალყურეო საბჭოს თავმჯდომარედ დაინიშნა, თავისი არჩევანი დაივიწყა და იგივეს გაკეთება დაიწყო, რაც ლევან ჩიკვაიძემ – ბრძოლა გამოუცხადა პროფკავშირულ აქტივობას და მას შემდეგ საქართველოს რკინიგზის მდგომარეობა უკან და უკან წავიდა. დააკვირდით, გაიხსენეთ რას პირდებოდნენ ეს ვაჟბატონები ადამიანებს ხელისუფლებაში მოსვლამდე და როდესაც მოდიან, ზუსტად იმის საპირისპიროს კეთებას იწყებენ, რასაც პირდებოდნენ. იმდენს მიაღწიეს, რომ შევარდნაძის მიერ რუსეთიდან ჩამოყვანილი კორუმპირებული აკაკი ჩხაიძე ზოგ–ზოგიერთებს მოანატრეს კიდეც.
საქართველოს რკინიგზაში მაღალ თანამდებობაზე დანიშნეს „კმარელი“ დაჩი ცაგურია, რომელიც გვახსოვს, კვერცხების სროლითა და ასფალტზე წოლით გამოირჩეოდა, ოღონდ, როცა თბილი ამინდი იყო. დემოკრატი რევოლუციონერის როლში იყო და ასე უწევდა წინააღმდეგობას სააკაშვილის რეჟიმს, რომელსაც ადრე თავად ემსახურებოდა და როდესაც ისეთი თანამდებობა ვერ მიიღო, რომელიც ხეირს მისცემდა, ახალი პატრონის მოძიება დაიწყო და მოძებნა კიდეც, ნომერ პირველი კაპიტალისტის სახით. 2012 წლის შემდეგ საქართველოს რკინიგზაში დაჩი ცაგურია კოკა გუნცაძემ თან წაიყვანა. ის არც რკინიგზის სპეციალისტი ყოფილა. იქნებ ფარცხალაძეს ბაძავენ, იურისტის დიპლომი არ ჰქონდა ტიპს და გენერალურ პროკურორად დანიშნეს, რა ხდება, პროფესიონალები არ ჰყავს საქართველოს რკინიგზას? არა, პროფესიონალებს უშვებენ თანამდებობებიდან და პოლიტიკურ მსახურებს ნიშნავენ თანამდებობებზე.
დაჩი ცაგურიას საქმიანობის შესახებ კიდევ უფრო ნათელი წარმოდგენა რომ ჰქონდეს საზოგადოებას, „ალია“ საქართველოს რკინიგზის პროფკავშირების ახალ თავმჯდომარეს, ვიტალი გიორგაძეს ესაუბრა
_ რა უნდა გითხრათ დაჩი ცაგურიაზე, მისგან სიცრუის მეტს ვერაფერს გაიგებთ, მასთან არ მაქვს ურთიერთობა.
_ რატომ?
_ რკინიგზაში სამართლიანი პროტესტი რომ გამოხატეს რკინიგზელებმა ხელფასების მატებასთან დაკავშირებით, ამ საპროტესტო აქციის წინააღმდეგი პირველი დაჩი ცაგურია იყო, ის მშომელი ხალხის გვერდით არ დადგა, ბევრი ტყუილი თქვა მასობრივი ინფორმაციის საშუალებებიდან. როგორც კი თანამდებობაზე აღმოჩნდა, დაავიწყდა, როგორ ებრძოდა ვითომ უსამართლობას, ასფალტზე ცარცით წერდა პოლიტიკურ განცხადებებს. ამ დროს თურმე ასფალტზე ცარცით ის თავის მომავალს ხატავდა. თუ საქართველოს რკინიგზის ახალი პროფკავშირი რკინიგზელთა ეკონომიკურ, სოციალურ და შრომით უფლებებს იცავს, შევარდნაძის დროიდან არსებობს ფსევდოპროფკავშირი, რომელიც სააკაშვილისა და ივანიშვილის რეჟიმების დროიდან მხოლოდ ადმინისტრაციის კაპრიზებს ემსახურება. მათთან კი დაჩი ცაგურიას არაფერი აქვს სადავო. სამაგიეროდ, დემოკრატი ცაგურია ხელს უშლის რკინიგზელებს თავიანთი კონსტიტუციური უფლებების განხორციელებაში. საქართველოს რკინიგზაში არიან პროფესიონალები, მაგრამ ასეთები ძალიან ცოტანი არიან.
_ რა საკითხებს აყენებს ახალი პროფკავშირი ადმინისტრაციის წინაშე?
_ ჩვენ მოვთხოვეთ ხელფასები 50%-ით მოემატებინათ. მაგრამ 10%-იან მატებას ძლივს მივაღწიეთ.
_ თავად დაჩი ცაგურიას რამდენი აქვს ხელფასი?
_ მისი ხელფასი 8000 ლარს შეადგენს, ის საქართველოს რკინიგზის მგზავრთა გადაყვანის დეპარტამენტის თავმჯდომარეა და წარმოიდგინეთ, რომ ღამის მატარებელში თეთრეული არ არსებობს. არადა, ამაში 7 მილიონამდე ლარია გადახდილი. სად გაქრა ეს ფული, კაცმა არ იცის.
_ პროკურატურისთვის არ მიგიმართავთ?
_ ჩვენ, ახალი პროფკავშირი, შრომის უფლებებზე ვართ ორიენტირებული. რადგან საოპერაციო ხარჯებზე წვდომა არ გვაქვს, ამიტომ არ მიგვიმართავს.
_ მეოცნებეების მოსვლის შემდეგ, ამბობენ, 7 მილიონი კი არა 300 მილიონამდე ლარი გააქრეს, რომელიც ზარალად გააფორმეს თურმე. რამდენად მართალია?
_ ჩვენ იმედი გვაქვს, რომ მალე დაინტერესდება შესაბამისი სამსახური ყველა ამ დანაშაულებრივ ფაქტებზე.
_ თქვენ რკინიგზაში მუშაობისას გაიცანით დაჩი ცაგურია თუ მანამდე იცნობდით?
_ ჩვენ სამტრედიის მე-13 სკოლა ერთად დავამთავრეთ და მთელი ბავშვობა ერთად გავატარეთ. ის სულ სხვანაირი მახსოვს. ფეხი „კმარადან“ აიდგა, მაგრამ ფეხი ვერ აუწყო „კმარელებს“ და ჩამოაცილეს.
_ მუდამ მზიანი სამტრედია დემოკრატების აკვანი ყოფილა. ყველაზე დიდი დემოკრატი ზვიად ძიძიგურიც სამტრედიელია.
_ თუ დაჩი ცაგურია, „კმარას“ პიონერი, სააკაშვილის რეჟიმს ასფალტზე მჯდომარე აქციებით ახსენებდა თავს, ზვიად ძიძიგური დიდ დემოკრატებს გორბაჩოვ–შევარდნაძეს რკინიგზის რელსებზე კოტრიალით უწევდა სამსახურს. ამიტომ ასე სწრაფად გამონახა საერთო ენა გორბაჩოვ–შევარდნაძის გამოზრდილ კაპიტალისტ ბიძინა ივანიშვილთან. დემოკრატიისთვის იბრძოდა იარაღით ხელში სამტრედიელი გენერალი ვაშაკიძე. ტყუილად არცერთს არ უბრძოლია. ყველამ თანამდებობები მიიღო, ხოდა, დაჩი ცაგურია ხომ არ ჩამორჩებოდა თავის სამტრედიელ დემოკრატებს? მაგანაც მიიღო თანამდებობები, ჯერ ერთი და მერე – მეორეც. მას ხომ თავისი პოლიტიკური მიზნები ჰქონდა, როცა „ოცნებისთვის“ აქტიურობდა.
_ მისი იმედი როგორ უნდა ჰქონდეს რკინიგზელებს ან თუნდაც მგზავრებს?
_ რკინიგზელებს მისი ნდობა არა აქვთ. მგზავრებიდან კი ბევრმა არ იცის, ვინ არის დაჩი ცაგურია, რომელიც რკინიგზის მგზავრთა გადაყვანის დირექტორია.
შეიძლება ბევრმა ისიც არ იცის, რომ დაჩი ცაგურია შევარდნაძისა და სააკაშვილის სახელმწიფო მინისტრისა და ივანიშვილის ფანკლუბის მოთავის და შეთავსებით კინორეჟისორის გოგა ხაინდრავას სიძეც გახლავთ. აი, ვინ არის საქართველოში დემოკრატიის სახე. მართლაც შეძლო ბიძინა ივანიშვილმა გასაოცარი დემოკრატიის აშენება სამტრედიელ დემოკრატთა კლანის კაშკაშა „ვარსკვლავის“ დაჩი ცაგურიას დახმარებით.
ნანა სულავა
ალია №36