კორუფციის რისკის ინდექსის მიხედვით, საქართველო აღმოსავლეთ ევროპასა და ცენტრალურ აზიაში პირველ ადგილზეა

“თრეის ინთერნეიშენალის” მიერ წარმოებული კორუფციის რისკის ინდექსის მიხედვით, საქართველო მსოფლიოში 27-ე, ხოლო ევროპაში მე-18 ადგილზეა. წინა წლის რეიტინგთან შედარებით ქულა არ შეცვლილა და კვლავ 26-ს შეადგენს.

საქართველო აღმოსავლეთ ევროპასა და ცენტრალურ აზიაში პირველ ადგილზეა და წინ უსწრებს ევროკავშირის 14 სახელმწიფოს. მათ შორის: იტალიას, პოლონეთს, უნგრეთს, სლოვაკეთს, სლოვენიას, ჩეხეთს, ლატვიას, ხორვატიას, საბერძნეთს, რუმინეთს, ბულგარეთს, კვიპროსს, მალტას, ესპანეთს.

გარდა ამისა, საქართველო რეიტინგში უსწრებს ევროპის განვითარებულ (ევროკავშირის არაწევრ ქვეყნებს) ქვეყნებს – ლიხტენშტეინს, ანდორას და სანმარინოს.ყველაზე მაღალი შეფასება საქართველომ მიიღო ბიზნესისა და მთავრობას შორის ურთიერთობის კუთხით, სადაც მას ამ კრიტერიუმში, საუკეთესო – ერთი ქულა აქვს.

ყველაზე დაბალი შეფასება – 44 ქულა საქართველომ ანტიკორუფციული კანონებისა და მათი აღსრულების კრიტერიუმში, კერძოდ კი, აღსრულების ნაწილში მიიღო.ინდექსის მიხედვით, კორუფციული რისკების შეფასება ეფუძნება ოთხ კრიტერიუმს: 1. ბიზნესის ურთიერთობა მთავრობასთან – საშუალო 16 ქულით, სადაც: ბიზნესის მთავრობასთან ურთიერთობა – ერთი ქულა; ქრთამის გადახდის მოლოდინი – 36 ქულა; ბერკეტებს სამართლებრივი ბაზის კუთხით – 14 ქულა.

ამ კრიტერიუმით საქართველო მსოფლიოში მე-10 ადგილზეა ახალი ზელანდიის, ჰონგ კონგის, გაერთიანებული სამეფოს შემდეგ.

ანტიკორუფციული კანონები და მათი აღსრულება – საშუალო 37 ქულით, სადაც: გადარწმუნება (გულისხმობს, რომ საზოგადოება არ მიესალმება ქრთამის აღების ფაქტს) – 37 ქულა; ქრთამის წინააღმდეგ აღსრულება – 44 ქულა აქვს; ამ კრიტერიუმით საქართველო 68-ე ადგილზეა მსოფლიოში.

სახელმწიფო სერვისების გამჭვირვალობა – საშუალო 31 ქულით, სადაც: პროცესებში მთავრობის გამჭვირვალობა – 28 ქულა; ფინანსური ინტერესების გამჭვირვალობა – 38 ქულა; ამ კრიტერიუმით საქართველო მსოფლიოში მე-40 ადგილზეა.

სამოქალაქო საზოგადოების მონიტორინგის შესაძლებლობა – საშუალო 31 ქულით, სადაც: მედიის თავისუფლება – 22 ქულა; სამოქალაქო საზოგადოების ჩართულობა – 40 ქულა; ამ კრიტერიუმით საქართველო მსოფლიოში 64-ე ადგილზეა.

“თრეის ინთერნეიშენალის” მიერ წარმოებული კორუფციის რისკის ინდექსი ბიზნესში მოსყიდვის რისკებს მსოფლიოს 200 ქვეყანაში ზომავს.ეკონომიკის მინისტრის შეფასებით, ერთ-ერთი მნიშვნელოვანი კომპონენტი ამ შეფასებაში არის “ხელისუფლების კორუფციაში ჩაურთველობა” და ამ თვალსაზრისით საქართველო მსოფლიოში მეათე, ევროპაში კი მეექვსე ადგილზეა.

“ეს გავლენიანი შეფასება აღიარებს იმას, რომ საქართველოს ხელისუფლება არის ერთ-ერთი ყველაზე გამჭვირვალე ევროპისა და მსოფლიოს უამრავ ქვეყანასთან შედარებით. ამის ყველაზე თვალსაჩინო ინდიკატორია ის გაზრდილი ნდობა, რასაც ბიზნესი საქართველოს ეკონომიკის, საქართველოს საინვესტიციო გარემოსა და ხელისუფლების ეკონომიკური პოლიტიკის მიმართ იჩენს”, – აღნიშნა ნათია თურნავამ.

მინისტრის თქმითვე, ეს ნდობა აისახება მაღალ ეკონომიკურ ზრდაში, რომელმაც 2019 წლის წინასწარი მონაცემით, 5,2 პროცენტი შეადგინა, ეს აისახება ბიზნესის გაზრდილ აქტივობაში პრივატიზაციის, სხვადასხვა სახის ლიცენზიების მიმართ.

“ის, რომ ჩვენ, იგივე გამჭვირვალობის ხარისხით, სხვადასხვა განვითარებულ ევროპულ ქვეყნებს ვუსწრებთ, როგორიცაა იტალია, პოლონეთი, ჩეხეთი თუ სხვა ქვეყნები, სწორედ ის ფაქტორია, რის გამოც ევროპული კომპანიები საქართველოში ჩამოდიან, იწყებენ აქ ახალ ბიზნესებსა და ახალ პროექტებს”, – განაცხადა ნათია თურნავამ.

გაზეთი „ბანკები და ფინანსები“

კომენტარები ფეისბუქიდან