რატომ არ გადადის გარდაბნის მერი კარანტინში? – “ოცნების” და “ავერსის” კლასტერი

“ალისთვის” ცნობილი გახდა, რომ გარდაბნის მერს რამაზ ბუდაღაშვილს თვითიზოლაციაში გადასვლა მოსთხოვეს ჯანდაცვის წარმომადგენლებმა. როგორც წყარო გვიყვება, მისი მეუღლე, ექიმი მაკა ძამნაშვილი, რომელიც “ავერსში” მუშაობს, კლინიკის ერთ-ერთი ინფიცირებულის კონტაქტია და წესით, ინფიცირებულის კონტაქტი და მასთან შემხებლობაში მყოფი პირები კარანტინში უნდა იქნენ გადაყვანილნი, ან, როგორც ახლა მოდაში შემოვიდა, თუ საქმე მაღალჩინოსანს ეხება, თვითიზოლაციაში მაინც.

“ალია” დაუკავშირდა გარდაბნის მერის მდივან-რეფერენტს, რომელმაც ჯერ მომხდარი უარჰყო, მერე გვითხრა, რომ დრო სჭირდება პასუხის გასაცემად. მერე დაგვიკავშირდა და გვითხრა, რომ გარდაბნის მერის მეუღლე მართლაც ექიმია და ინფიცირებულის კონტაქტი, მისი მოკვლევა მოხდა ისევე, როგორც ყველა კონტაქტის, მაგრამ გარდაბნის მერი არ არის თვითიზოლაციაში, ის უბრალოდ შვებულებაშია ორშაბათიდან და საერთოდაც, ვერ უკავშირდება.

ვიკითხეთ გარდაბნის მერის მეუღლის სახელი და გვითხრეს, რომ არ იციან, ვინ არის მისი ცოლი. რადგან საჯარო მოხელე მერია და არა მისი მეუღლე.

რა ვიცით, საჯარო მოხელე სანამ გახდებიან, ოჯახის ფოტოებს აკრავენ ყველგან და მერე რატომ ხდება საიდუმლო? ან თუ საიდუმლოა, საჯარო მოხელის დეკლარაციაში რატომ იწერება მისი ოჯახის წევრების პირადი ინფორმაცია?

“ალიას” წყარომ მოაწოდა ინფორმაცია, რომ გარდაბნის მერმა სამშაბათს მერიის თანამშრომლებთან შეხვედრა გამართა, შესაბამისად, მერიის თანამშრომლებიც ირიბი კონტაქტები გამოდიან და წესით, ისინიც უნდა გადავიდნენ თვითიზოლაციაში, თუმცა, მერიის წარმომადგენელი გვიმტკიცებს, რომ მერი შვებულებაშია და არ დადის მერიაში.

მერიის თანამშრომელი იმასაც გვიმტკიცებს, რომ მერი კარანტინში და თვითიზოლაციაში არ გადასულა, თუ მართლაც ასეა, ძალიან ცუდია, რადგან, ცოტა ხნის წინ ქვეყნის ჯანდაცვის მინისტრმა განცხადება გააკეთა, რომ “ავერსის” კლინიკების ყველა თანამშრომელი გაიტესტება და პირადად ის და პრემიერი უხელმძღვანელებენ ამ საკითხს, აგერ კი, “ავერსის” ინფიცირებული ექიმის კონტაქტი და მისი მეუღლე არ არიან თურმე კარანტინში.

ხო, მერის მდივან-რეფერენტიც შვებულებაშია, ყოველ შემთხვევაში, თავად ასე გვითხრა.

რაკი პირადად პრემიერი კურირებს, როგორც ჯანდაცვის მინისტრმა მოგვახსენა, “ავერსის” კლინიკების თანამშრომელთა ტესტირებას, ჩვენც პირადად პრემიერს მივმართავთ, იქნებ, პრემიერის სამსახურიდან ვინმემ გაარკვიოს, ყველა თანამშრომელი კი არა, ინფიცირებულის კონტაქტი და მისი ოჯახი რატომ არ არის კარანტინში და რატომ აგდებენ საფრთხეში ადგილობრივ მოსახლეობას? იქნებ, ვინმემ დაადგინოს, ჰქონდა თუ არა გარდაბნის მერს შეხვედრა მერიაში სამშაბათს და თუ იყო ასეთი შეხვედრა, როგორ გააფორმა შვებულება წინა თარიღით და რა ბედია ეწევა იმ თანამშრომლებს, რომლებიც მერთან იყვნენ კონტაქტში?

იმედია, პრემიერის სამსახური 18 წელს არ მოანდომებს ამის დაგენას. რა შუაშია 18 წელი? “ინფო რუსთავის” ინფორმაციით, გარდაბნის მერი 18 წლის მანძილზე ცდილობდა აეღო დიპლომი,

დოკუმენტში აღნიშნულია, რომ 1987 წელს რამაზ ბუდაღაშვილი საქართველოს ტექნიკურ უნივერსიტეტში ავტომობილებისა და საავტომობილო მეურნეობის ფაკულტეტზე ჩაირიცხა, ბაკალავრის სრული კურსი კი 18 წლის შემდეგ 2005 წელს დაასრულა.

2005 წელს ბუდაღაშვილს, საავტომობილო ტრანსპორტის სპეციალისტის ბაკალავრის აკადემიური ხარისხი მიენიჭა, ავტომობილებისა და საავტომობილო მეურნეობის კვალიფიკაციით. გარდაბნის ამჟამინდელი მერი პროფესიით საავტომობილი ტრანსპორტის სპეციალისტია.

კიდევ ბევრი ინფორმაციის მოძიებაა შესაძლებელი გარდაბნის მერზე, მაგალითად, 2018 წლის მხოლოდ დეკემბერში, როგორ ჩაურიცხა თავის თავს ხელფასის ოდენობით სამჯერ მერი პრემია-დანამატი.

ასეა თუ ისე, ფაქტია, მაღალჩინოსნები კარანტინს გაურბიან, უბრალო მოქალაქეები კი პოლიციის მანქანებით გადაჰყავთ.

აქვე იმასაც მოგახსენებთ, რომ სანამ ჯანდაცვის მინისტრი იმას გვირჩევს, ბათუმიდან ყველა ჩამოსული გადავიდეთ თვითიზოლაციაში, არც ის დაავიწყეს, რომ მისი თანამშრომლები, პრემიერი და მინისტრები 2 დღის წინ ჩამოვიდნენ ბათუმიდან და თვითიზოლაციაზე არც კი უფიქრიათ.
alia.ge

კომენტარები ფეისბუქიდან