ქართული ოცნებაში მონასტერი კიდევ აირია

ბიძინა ივანიშვილის პოლიტიკურ კულისებში გადანაცვლების შემდეგ, მმართველი პარტიის გავლენიანმა და ერთმანეთთან დაპირისპირებულმა წევრებმა გავლენების გადანაწილება აქტიურად დაიწყეს.

მმართველ პარტიაში ყველამ იცის, რომ ირაკლი კობახიძესა და გიორგი გახარიას შორის მწვავე დაპირისპირება ერთ წელიწადზე მეტია არსებობს. აქამდე მათ ივანიშვილი ანეიტრალებდა, თუმცა მისი წასვლის შემდეგ, კონფლიქტი დღითი-დღე მწვავდება.

პარლამენტის გადაყენებულ თავმჯდომარეს, ირაკლი კობახიძეს პრემიერობა უნდა. მთავრობის მეთაურად ხედავს საკუთარ თავს დედაქალაქის მერიც, რომელსაც ამ თანამდებიბაზე მუშაობის ვადა რამდენიმე თვეში ეწურება.

“ნიუპოსტს” მმართველი პარტიის წარმომადგენელი უყვება, რომ ახლა კობახიძე-კალაძის ნომერ პირველი მიზანი გახარიას პრემიერობიდან ჩამოცილებაა და ეს მათი გათვლებით გაზაფხულზე უნდა მოხდეს.

უქმად არც გახარიაა, ჩვენი ინფორმაციით უკანასკნელ დღეებში პრემიერი ქართული ოცნების საპარლამენტო გუნდის ნაწილს ფარულად შეხვდა და მათი პოზიციები მოისმინა.

ჩვენთვის მოწოდებული, არაოფიციალური ინფორმაციით, გახარია პოლიტიკურ მოკავშირედ პარლამენტის თავმჯდომარეს არჩილ თალაკვაძეს მოიაზრებს, თუმცა უცნობია თავად თალაკვაძის პოზიცია. კულუარულად მხოლოდ ის გახდა ცნობილი, რომ კობახიძეს მის მიმართ პირადი, “პოლიტიკური ბოღმა” აქვს, რადგან “გავრილოვის სისხლიანი” ღამის შემდეგ, ივანიშვილთან სწორედ თალაკვაძე დაწინაურდა.

როგორც აღვნიშნეთ, პოლიტიკური ცვლილებები სავარაუდოდ გაზაფხულიდან დაიწყება. მმართველ პარტიას კობახიძესთან დაპირისპირებული ადამიანებიც დატოვებენ. გახარიასთან ერთად, გუნდს ვანო ჩხარტიშვილის კადრებიც დატოვებენ.

ადამიანები, რომლებიც “ქართული ოცნების” შიდა სამზარეულოს კარგად იცნობენ, ამბობენ, რომ “კობახიძე კალაძეს” პრობლემას ვერავის შეუქმნის.

“რომ არა ივანიშვილი შეიძლება ფიზიკურად დაპირისპირებოდნენ მას (ირაკლი კობახიძე) და ახლა ვინ არის შემაკავებელი. დაშლის პროცესი გარდაუვალია… კალაძეს ექნება ამბიციები, კობახიძე მას ვერასდროს ვერ შეუქმნის პრობლემას – აცხადებს ეკა ბესელია.

“ქართული ოცნების” კიდევ ერთი ყოფილი წევრი დავით ჭიჭინაძე კი თვლის რომ ბიძინა ივანიშვილმა ირაკლი კობახიძე პარტიის “მესაფლავედ” დატოვა:

“ივანიშვილმა კობახიძის დანიშვნით განაჩენი გამოუტანა ქართულ ოცნებას. მას უნდა რომ ის გააქროს და გაანადგუროს, იმიტომ რომ სანამ იქნება ქართულ ოცნების ხსენება, მანამდე იქნება ივანიშვილს ლანძღვა” -აცხადებს ჭიჭინაძე.

“ქართული ოცნების” ლიდერები ჩართული კამერების წინ, დაპირისპირებას და გავლენების გადანაწილებას უარყოფენ.

“ყველაფერი, რაც ითქმევა, მიმართულია იქითკენ, რომ როგორმე ჩრდილი მიაყენონ არსებულ ვითარებას შიგნით და ადამიანურ ურთიერთობებს. იქ – კახი თურმე გაბრაზებულია ირაკლიზე, ირაკლი გაბრაზებულია პრემიერზე, იქ – თურმე კახის ეს ამბიციები აქვს, ირაკლის ის ამბიციები აქვს… სულ ტყუილია, გამოჭმული, გაფუჭებული კვერცხის ნაჭუჭის ფასი არ აქვს ამ ნათქვამებს არცერთს,” – აცხადებს გია ვოლსკი.
niuposti.

კომენტარები ფეისბუქიდან